وزیر اعلی سہیل آفریدی کا خیبر پختونخواہ کی پولیس کے لیے اہم اقدام
پشاور کے تاریخی پولیس لائنز میں آج آٹھ دسمبر کو ایک عظیم الشان اور باوقار تقریب منعقد ہوئی جس میں وزیرِ اعلیٰ خیبر پختونخوا سہیل آفریدی نے شرکت کرتے ہوئے صوبائی پولیس کو جدید دور کے تقاضوں سے ہم آہنگ بنانے کی طرف ایک اور بڑا قدم اٹھایا۔ اس تقریب کا مرکزی مقصد خیبر پختونخوا پولیس کو بلٹ پروف گاڑیاں، بکتر بند پرسنل کیریئرز، جدید ہتھیار اور سکیورٹی آلات باضابطہ طور پر حوالے کرنا تھا تاکہ دہشت گردی کے بڑھتے ہوئے چیلنجز اور ضم شدہ اضلاع میں امن و امان کی صورتِ حال کو مزید مستحکم بنایا جا سکے۔ تقریب میں چیف سیکرٹری ندیم اسلم چوہدھری، انسپکٹر جنرل پولیس اختر حیات خان گنڈاپور، ایڈیشنل آئی جی اسپیشل برانچ، کمانڈنٹ فرنٹیئر کانسٹیبلری سمیت تمام رینجز کے آر آئی جی اور ڈی آئی جی بھی شریک ہوئے، جبکہ پولیس کے جوانوں نے شاندار پریڈ پیش کر کے مہمانوں کو سلامی دی۔
وزیرِ اعلیٰ نے اپنے خطاب میں کہا کہ موجودہ دور میں پولیس کو نہ صرف بہادر بلکہ جدید ٹیکنالوجی سے لیس بھی ہونا چاہیے۔ انہوں نے بتایا کہ آج جو سامان پولیس کے حوالے کیا جا رہا ہے اس کی مالیت اربوں روپے ہے اور یہ تمام تر ترجیحات کے باوجود صوبائی وسائل سے فراہم کیا گیا ہے۔ انہوں نے خاص طور پر ضم شدہ اضلاع کی پولیس اور کاؤنٹر ٹیررازم ڈیپارٹمنٹ (سی ٹی ڈی) کی صلاحیتوں میں اضافے پر زور دیا اور واضح کیا کہ صوبائی حکومت پولیس کو وفاقی اداروں پر انحصار کیے بغیر خودمختار اور مضبوط بنایا جا رہا ہے، حوالے کیے جانے والے سامان میں سب سے نمایاں بلٹ پروف گاڑیاں اور آرمرڈ پرسنل کیریئرز تھے جو فرنٹ لائن ڈیوٹی کے دوران اہلکاروں کی جانیں بچانے میں کلیدی کردار ادا کریں گے۔
اس کے علاوہ جدید ڈرون کیمرے، اینٹی ڈرون گنز اور مکمل اینٹی ڈرون سسٹم دیے گئے جو دہشت گردوں کے ڈرون حملوں کو ناکام بنانے کی صلاحیت رکھتے ہیں۔ تھرمل امیجنگ کیمرے، تھرمل ویپن سائٹس اور نائٹ وژن بائنوکلرز رات کے وقت آپریشنز کو زیادہ موثر بنائیں گے۔ موبائل اور پورٹیبل جیمرز دھماکہ خیز مواد کو ریموٹ کنٹرول سے دھماکے کرنے کی صلاحیت ختم کر دیں گے۔ہتھیاروں کے شعبے میں سنائپر رائفلز بشمول روس سے درآمد کردہ ڈریگونوف ایس وی ڈی، امریکی ایم سولہ رائفلز، جرمن ایم پی فائیو، سب مشین گنز، ہیوی مشین گنز اور جدید سائیڈ آرمز شامل تھے۔ اس کے علاوہ لیول فور بلٹ پروف جیکٹس، بیلسٹک ہیلمٹس، بلٹ پروف شیلڈز، رائٹ شیلڈز (ریوو) اور گاڑیوں کے لیے اضافی سائیڈ آرمر کٹس بھی دی گئیں۔
وزیرِ اعلیٰ نے اعلان کیا کہ یہ سلسلہ جاری رہے گا اور آئندہ چند ماہ میں پولیس کو مزید جدید ہیلی کاپٹرز، آرمرڈ بوٹس اور فرانزک لیبارٹریز بھی فراہم کی جائیں گی۔آخر میں وزیرِ اعلیٰ نے شہداءِ پولیس کو زبردست خراجِ عقیدت پیش کیا اور موجودہ افسران و اہلکاروں سے کہا کہ یہ سامان ان کی امانت ہے، اسے صحیح معنوں میں استعمال کرتے ہوئے صوبے سے دہشت گردی کا مکمل خاتمہ کیا جائے۔ تقریب کے اختتام پر وزیرِ اعلیٰ نے خود گاڑیوں اور آلات کا معائنہ کیا اور پولیس اہلکاروں سے ملاقات کر کے ان کی حوصلہ افزائی کی۔ یہ تقریب نہ صرف پولیس کے لیے بلکہ پورے صوبے کے لیے ایک تاریخی دن ثابت ہوئی جس نے یہ پیغام دیا کہ خیبر پختونخوا کی حکومت اپنی پولیس کو دنیا کی بہترین پولیس فورسز کے برابر لانے کے لیے پوری طرح مصمم ہے۔
